وفاقی حکومت نے نوجوانوں کو بااختیار بنانے کے لیے 150 ارب روپے مالیت کے وزیراعظم کے یوتھ ڈویلپمنٹ پیکج کا باضابطہ آغاز کر دیا ہے۔وزیر اعظم یوتھ ڈویلپمنٹ پیکج کی چھتری کے تحت منگل کو منعقدہ ایک تقریب کے دوران وفاقی وزیر برائے منصوبہ بندی ترقی اور خصوصی اقدامات پروفیسر احسن اقبال نے 15 پروگراموں کا آغاز کیا۔تقریب میں وزیراعظم کی معاون خصوصی برائے امور نوجوانان شزہ فاطمہ، چیئرمین ہائر ایجوکیشن کمیشن ایچ ای سی ڈاکٹر مختار احمد اور ملک بھر سے ہزاروں طلباء نے شرکت کی۔
تقریب سے خطاب کرتے ہوئے وفاقی وزیر منصوبہ بندی کا کہنا تھا کہ ملک کی دو تہائی آبادی نوجوانوں پر مشتمل ہے جنہیں تعلیم اور ہنر کے ذریعے بااختیار بنانا حکومت کی اولین ترجیح ہے اور وزیراعظم یوتھ ڈیویلپمنٹ پیکج اس کا ایک منہ بولتا ثبوت ہے جسکے تحت ملک کے نوجوانوں کے کیے 15 منصوبوں شروع کئے گئے ہیں تاکہ وہ ملک کی سماجی و اقتصادی ترقی میں اپنا بھر پور کردار ادا کر سکیں۔
وفاقی وزیر منصوبہ بندی نے شرکاء سے خطاب کرتے ہوئے کہا کہ یہ 150 ارب کے منصوبے پاکستان کے نوجوانوں کی قسمت بدلیں گے اور وہ معاشرے کہ ترقی میں اپنا بھرپور کردار ادا کریں گے۔ انکا کہنا تھا کہ وزیراعظم کا بااختیار نوجواں انٹرن شپ پروگرام پاکستان کا سب سے بڑا انٹرن شپ پروگرام ہے جس کا مقصد نوجوانوں کو معاشی طور پر بااختیار بنانا ہے۔ اس پروگرام کے تحت پاکستان بھر کے نوجوان گریجویٹس کو 60,000 بامعاوضہ انٹرن شپ دی جائیں گی۔ اسی طرح وزیراعظم کا یوتھ لیپ ٹاپ پروگرام حکومت کے اہم اقدامات میں سے ایک ہے۔
پروگرام کے تحت پبلک سیکٹر کے اعلیٰ تعلیمی اداروں میں زیر تعلیم طلباء کو ڈیجیٹل طور پر بااختیار بنانے کے لیے 100,000 لیپ ٹاپ تقسیم کیے جائیں گے۔ماضی میں نظر انداز کیے گئے بلوچستان کی محرومیوں کو ختم کرنے کے لیے وزارت منصوبہ بندی نے بلوچستان اور سابق فاٹا کے طلباء کے لیے 5000 وظائف کا پروگرام شروع کیا ہے۔ اس پروگرام کے تحت بلوچستان اور فاٹا کے طلباء کو 5000 وظائف دیے جائیں گے۔ وزیر نے ریمارکس دیئے کہ یہ وظائف بلوچستان اور سابق فاٹا کے طلباء کو متعلقہ شعبوں میں اعلیٰ تعلیم حاصل کرنے میں مدد فراہم کریں گے۔
واضح رہے کہ پاکستان کی تاریخ میں پہلی بار حکومت نے ملک کے 20 غریب ترین اضلاع کی ترقی کے لیے ایک منصوبہ شروع کیا ہے اور اس مقصد کے لیے 40 ارب روپے رکھے گئے ہیں۔وزیر نے ینگ پیس ڈیولپمنٹ کور (وائی پی ڈی سی) سے بھی حلف لیا جو ملک کی مختلف یونیورسٹیوں سے منسلک تھے۔ وائی پی ڈی سی کا کلیدی مقصد نوجوانوں کے لیے اکٹھا ہونا، خیالات کا تبادلہ کرنا اور ایسے منصوبوں پر تعاون کرنا ہے جو امن کو فروغ دیتے ہیں اور اپنی برادریوں میں تنازعات اور تشدد کی بنیادی وجوہات کو دور کرتے ہیں۔
قبل ازیں تقریب سے خطاب کرتے ہوئے وزیراعظم کی معاون خصوصی امور نوجوانان شزہ فاطمہ نے کہا کہ حکومت ملک کے نوجوانوں کو ایک سازگار ماحول فراہم کرنے کے لیے پرعزم ہے تاکہ وہ بااختیار ہو کر ملک کی سماجی و اقتصادی ترقی کے لیے کارکردگی کا مظاہرہ کر سکیں۔
